فلنخلع الأقنعه: يوميات عمار وعـُمير ( الحلقه الأولى )

يوميات عمار وعـُمير

(1) كان نفسى انااام

عمير.. صباح الخير يا عمار

عمار.. أهلا ًعمير

عمير.. مالك ..!! شكلك متغير ليه؟!

عمار.. أبدا ًجاى قرفان ومزاجى مش ولا بد

عمير.. ليه يا عم باين عليك ما نمتش كويس

عمار.. هو انا نمت أصلا ً

عمير.. إزاى انا مش سايبك إمبارح بعد الشغل وكنت بتقول هتروح تنام على طول من الإرهاق والتعب

عمار.. أنااام..! هههه هو اللى زى حالاتى يشوف نوم ولا راحه

انا يابنى وصلت البيت من هنا والدوشه بتاعت كل يوم إشتغلت

عمير.. دوشة إيه؟

عمار.. العيال ياسيدى..حسن كسر باتمان بتاعى يابابا.. أنا ماكسرتوش سناء هيه اللى كانت بتلعب بيه يابابا.... بابا بابا بيسو

قطع ورقه من كراستى يابابا ..... هيه اتقطعت لوحدها إسأل ماما

- فين ماما

- فى المطبخ

- إنتى ياستى ..بتعملى إيه ؟!

- يعنى هكون باعمل إيه بالعب يعنى .. ادينى باغسل الصحون وهحضر الغدا نص ساعه ويكون جاهز

- لسه نص ساعه حرام عليكى عاوز انااام

- ماتنام انا حايشاك

- انام إزاى وانا جعااان

- أعملك إيه مانت مشيت الصبح من غير ماتسيب فلوس وعارف إن انا عاوزه اروح السوق

- يعنى كمان مفيش أكل

- هسخن المكرونه بتاعت إمبارح واحمر شوية بطاطس

- الله يسامحك يا شيخه ... أنا داخل انااام سكـّـِتى عيالك

ويدوب غيرت هدومى ولسه هناااام .... بابا بابا كلم ماما

-إيه يا ستى

-إنتا مش هتروح تجيب الراجل بتاع الغسالات عشان يصلح الغساله..مش قالك عدى عليه بعد العصر

- يييه..انا كنت ناسى .. خليها لبكره

- والغسيل اللى متكوم بقاله إسبوعين ده أعمل فيه إيه.. يلا قوم روح هاته ولما يخلص إبقا ناااام

- قمت يابنى ولبست هدومى تااانى ونزلت عشان اجيب الراجل بتاع الغسالات وفضلت قاعد جنبه فى الورشه على ما يخلص الشغلانه اللى فإيده

- ثوانى يا بيه وآجى معاك

- وخبط ساعه ونص وانا ميت من الجوع وبنام على نفسى .. وأخيرا ً

- يلا بينا ... هيه الغساله فيها إيه ؟

- مش عارف كانت شغاله وفجأه وقفت ومش عاوزه تشتغل

- ربنا يستر ومايكونش الموتور إتحرق .أنا رأى تجيبلك واحده فوول أوتوماتيك

- ربنا يسهل .. كله على الله

وصلنا البيت وبدأيشتغل فى الغساله يفك ويربط ويدق ويخبط ييجى ساعتين وانا واقف جنبه وفى الآخر قال ..مفيش فايده الموتور لازم يتغير ..!!

وطبعا ً هبش 20 جنيه ومشى

وانا بدون تردد جريت على السرير عشان انااام

- مش هتاكل

- لأ سيبينى انااام

- تنام إيه يا راجل إحنا بقينا بعد المغرب

- إن شالله نكون بعد السعوديه سيبينى انااام

- إنت ناسى إن اختى أمل وأشرف جوزها زمانهم جايين ودول عرسان جداد ولازم نحتفل بيهم

- عرسان جداد ...!! دول متجوزين من 6 شهور

- وماله بس دى أول مره ييجو عندنا بعد الفرح

- والمطلوب؟؟!!

- هات فلوس أبعت الواد ميدو يجيب حاجه ساقعه وانت انزل هات دستتين جاتوه من الحلوانى اللى فى الميدان..بس بسرعه الله يخليك احسن دول على وصول

- آآآآه يابا ..نفسى اناااام

- يلا بس وبعد ما يمشو ابقا نام براحتك

- وطبعا ًكالعاده قمت نزلت وانا بابرطم بكلام انا نفسى مش فاهمه ولا فاكره

وبالفعل وصل أشرف وأمل وبصراحه كانت سهره لطيفه حتى الدوشه بتاعت العيال تاهت وسط كلامنا وضحكاتنا المتواصله ولم نشعر بالوقت حتى فوجئنا بالساعه تدق الثانيه صباحا فانصرفا على وعد بتكرار الزياره ..والغريب يا عزيزى إن النوم طار من عينى.

وهنا يدخل عم عبده ساعى الشركه ويقول

- أستاذ عمير كلم سيادة المدير

- تعالى ياعم عبده جيت فى وقتك انا عاوز سندوتشات عشان افطر تفطر معايا يا عمير . أعمل حسابك

- لا شكرا ًيا عمار انا فطرت فى البيت

- ........... يابختك !!

وإلى اللقاء فى الحلقه القادمه

ويوم ٍجديد ،،

عادل ،،